Արարատի մարզում խաղողագործները դարձյալ փակել են ճանապարհը
2021-09-04 | Դիտվել է 299 անգամ
Այսօր, Երևան-Երասխ ավտոճանապարհի Փոքր Վեդի վարչական տարածքում մի քանի գյուղերի բնակիչներ՝ ի նշան բողոքի, դարձյալ փակել են ճանապարհը՝ կապված խաղողի մթերումների հետ։ Այս մասին հայտնում է shamshyan.com-ը:
Դեպքի վայր են ժամանել մեծ թվով ոստիկաններ՝ ոստիկանության Արարատի մարզային վարչության պետ Գրիշա Ամիրխանյանի գլխավորությամբ։ Ժամանել են նաև ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ վաշտի հրամանատար Գրիգոր Պողոսյանի, դասակի հրամանատար Կարապետ Հարությունյանի գլխավորությամբ։
Խաղողագործները պահանջում են մարզպետի և կառավարության ներկայացուցչի հետ հանդիպում։
Հիշեցնենք, որ կառավարության վերջին նիստի ժամանակ փոխվարչապետ Սուրեն Պապիկյանը հայտարարեց, որ այլևս չի լինելու դեպք, երբ խաղողագործները, առանց հիմնավորումների, կփակեն ճանապարհը։
NEWS.am-ի հետ զրույցում Փոքր Վեդիի համայնքապետ Նորիկ Մարտիրոսյանն ասաց, որ ինքը տեղյակ չէ, որ բնակիչները ճանապարհ են փակել, քանի որ գտնվում է Երեւանում: